Orella pendella

Té,
chocolate,
café,
para San Xosé,
que está maliño dun pé.

Explicación:
A función do dito é acariñar o/a meniño/a a quen se lle di: “Té” (o adulto acaricia a cara do rapaz coas dúas mans), “chocolate” (acaricia a súa propia) e así alternativamente.

Esperanza, de Ferrol

Nun caixón
hai catro gatos:
un, dous, tres e catro.

Cortizas, Antón: ”Chirlosmirlos...”

Gato, gato
Maragato,
dime a verdade
se non te mato;
un, dous, tres e catro.

Cortizas, Antón: ”Chirlosmirlos...”

Taco, taco,
número catro;
un, dous, tres e catro.

Cortizas, Antón: ”Chirlosmirlos...”

Para min,
para vós,
“pra” ningún
de vós os dous.

Cortizas, Antón: ”Chirlosmirlos...”

Chirlosmirlos,
vaite de aí
que esta nena bonita
non é para ti.

Cortizas, Antón: ”Chirlosmirlos...”

Imos de paseo
co gato no seo
e se nos rabuña
cortámoslle as uñas;
e se nos mauea
cortámoslle as meas.

Explicación:
Cóllese o/a meniño/a polas mans, mirando ambos para a fronte, e camíñase con el/ela compasándose o andar con esta lengalenga.
Outra posibilidade é que o adulto e mais o/a neno/a se miren de fronte e se collan por ambas as dúas mans. O/A neno/a monta cada pé enriba de cada pé do adulto e este comeza a andar con el/ela unha restra de pasos.

Cortizas, Antón: ”Chirlosmirlos...”

¿Queres que che faga a boaventura?
A boaventura
que Deus che ha de dar,
se che pica a mosca
terás que rascar.

Explicación:
O adulto pregunta e o/a neno/a tende unha man. O adulto, co seu dedo indicador faralle riscos e cruces na palma ó tempo que di: “A boaventura...” Cando chega ó último verso, o adulto, cos seus dedos apiñados, faille cóxegas na palma da man ó/á neno/a, que ó momento a retirará. Repítese o xogo cantas veces se queira.

Cortizas, Antón: ”Chirlosmirlos...”

-¿Foi o teu pai ós lobos?
- Foi.
- ¿Trouxo moitos?
- Trouxo.
- ¿Imos a eles?
- Imos.

Explicación:
Tense a criatura no colo e fálase con ela do xeito anterior. Ó rematar, comezan ambos a soprárense na cara un co outro, a cada cal máis forte.

Cortizas, Antón: ”Chirlosmirlos...”