Burlas, disparates e mentiras

O corazón dunha pulga
e as orellas dunha lebre
heillas de dar ó meu home,
que lle sabe moito o prebe.

-¿Dez e dez?
- Vinte.
- Que veña o demo e que te pinte.
Que te sente nunha “silla”
e que che dea unha rosquilla.
Que te sente nun “sillón”
e que che dea un cagallón.

- ¡Ai, a Coresma...!
- ¿...?
- A cabalo de ti por unha perna.

Iria, Ramón Fontenla e Virtudes Caamaño, de Valiñas - Barro

- Mira o que hai alí.
- ¿...?
- O “Entruido”; a cabalo de ti por un “descuido”.

Iria, Ramón Fontenla e Virtudes Caamaño, de Valiñas - Barro

- ¿Que?
- O ollo do cu non ve.

Explicación:
Para responder cando alguén fai que non oe.

Josean, de Marín

- ¿Canto son cinco e cinco?
- Dez.
- Fáltache a albarda, que burro xa es.

Cristalina, de Parderrubias – Ourense

“Chaval”, aperta o cu
e dálle ó pedal.

Explicación:
Díselles ós que pasan pola estrada en bicicleta, pedaleando costa arriba, cansos polo esforzo.

Margarita Fernández, de Bermés – Lalín

Margaridiña, ten un gatiño,
coas orelliñas de trapiño
e os olliños de cristal.
¡Pobriño o animal,
cando vai comer o sal!

Explicación:
Díselles ás que se chaman Margarida.

Margarita Fernández, de Bermés – Lalín

¡Dente fóra,
“caghallón” na cova!

Explicación:
Cando lle cae un dente ó/á neno/a, tírase por riba do forno e dise así.

Avó Antonio, de Marín