Para xogar cos dedos

Paxariño, rechinchiño,
vaite esconder
detrás da pía de tía Inés
que “te” toca a túa dita “ves”.

Explicación:
Vanse tocando os dedos do bebé e ó que lle toque a palabra “ves” escóndese. E así ata escondelos todos. Este dito tamén se usa para botar as sortes.

Pequeniño,
“Mai-grandiño”,
Pai de todos,
Furabolos
e “Mata-pollos”.

Dedín, dedín,
samarroquín,
rabo de rula,
mazarula,
cando o rei
por aquí pasou,
todas as damas
conquistou,
menos unha que
queedouuuuu.

Explicación:
A medida que se recita vanse tocando e agochando os dedos do/a neno/a ata que só quede un.

Roberto Mellid

Este foi ó monte,
este colleu leña,
este foi ós ovos,
este fritiunos
e este gordiño comeunos todos.

A nosa memoria- Marín

Pim, pim,
regorín
contra as vacas de Verín.
Paxariño, fai un niño
unha legua fóra
de onda min.

Explicación:
Cántase dando nos dedos. Comézase polo gordo e hai dúas voltas.

Mónica de Escornabois - Trasmiras - Ourense

Este foi por leña.
Este foille axudar.
Este foi por un ovo.
Este fritiuno
e este gordo comeuno.

Mónica de Escornabois-Trasmiras-Ourense

“Iste” pide pan.
”Iste” di que non o hai.
“Iste” di que o roubemos.
“Iste” di que é pecado.
“Iste” di que o confesemos.

Miguel de Barbadás.

Este é o minín, minín,
este é o menón, menón,
este, o máis grande de todos,
este é o furabolos
e este, o matapiollos.

Escóitao

Este é o dedo meniño,
este é o seu sobriño,
este é o pai de todos,
este é o furabolos
e este, o matapiollos.

Explicación:
O adulto vaille collendo os dedos ó/á neno/a dende o máis pequeno ó máis gordo. Con este recitado o/a neno/a aprende os nomes populares dos dedos da man. Hai moitas variantes en canto ós nomes.

M. Barrio - J. Pérez Ballesteros: : “Cancionero Popular Gallego”

Escóitao

Este foi ó mar e non pescou nada.
Este foi ó mar e pescou unha pescada.
Este quedou en terra e lavouna ben lavada.
Este quedou en terra e fixo unha caldeirada.
E este lambón, lacazán... ¡papouna, ben papada!

Explicación:
O adulto vaille collendo os dedos ó/á neno/a dende o máis pequeno ó máis gordo.