Recitados diversos

- ¿Como che vai, Sindo?
- Ás veces chorando,
ás veces rindo.

Geni e Elena, de Alxén – Salvaterra

-¿Por que non “te” cociches, verza?
- Porque non me revolviches, besta.

Explicación:
Dise para aprender que as verzas hainas que revolver para que cozan.

Seradela vai,
seradela vén,
picotaso vai,
picotaso vén,
sssssssssssss

Explicación:
Cántase cando se vai coas vacas para que pensen que hai moscas e escapen para a casa no verán.

María, de Baredo – Baiona

Unha e unha, dúas;
quero filloas das túas.
Dúas e dúas, catro;
ben postiñas no prato.
Catro e catro, oito;
dáme tamén biscoito.
Oito e oito, dezaseis;
trinta e dous pasteis.
Ponos nuha bandexa
e que ninguén os vexa.

Roberto Mellid, de Miño

Frío, frío,
coma a auga do río.
Morno, morno,
coma a auga do chorro.
Quente, quente,
coma a auga que ferve.

Rico Verea, Manuel: “Tantarantán...”

Carrapuchiña,
carrapucheira,
corre lixeira,
que se non corres,
lobolobeiro
chega primeiro.

Rico Verea, Manuel: “Tantarantán...”

Bate, meu leite,
na cántara nova
con tres pelouriños
e mais o da roda.
Bate, meu leite,
se te has de bater,
que na casa teño
quen te ha de comer.

Rico Verea, Manuel: “Tantarantán...”

Meu neniño, pequeniño,
como non che teño nada que dar,
tráioche estas zoquiñas
para cando saibas andar.
¡Arrenegado sexa o demo
se non che están ó pintar!
¡Que “sonche” de pau de amieiro,

que che mas fixo meu pai!

Explicación:
Recitado para o neno Xesús no Nadal.

Puchinocativo (aprendido da tía Teresa,Teté), de Cervo

Come e bebe e ponte gordo
e cando chamen por ti
fai o xordo.

Manga rachada
foi a Castilla
e no camiño
topou unha filla
toda vestida
de seda labrada
porque era filla
de Manga Castaña.

Rico Verea, Manuel: “Tantarantán...”