Meu neniño, pequeniño,
como non che teño nada que dar,
tráioche estas zoquiñas
para cando saibas andar.
¡Arrenegado sexa o demo
se non che están ó pintar!
¡Que “sonche” de pau de amieiro,

que che mas fixo meu pai!

Explicación:
Recitado para o neno Xesús no Nadal.

Puchinocativo (aprendido da tía Teresa,Teté), de Cervo

Come e come ben
e ponte gordo
e se te chaman
fai o xordo.

Teodoro, do Valadouro

Chan parranchán
foi a “Castilla”.
Cando voveu
encontrou unha neniña
toda vestida
de seda labrada
porque era filla
de manga rachada,
manga rachada.

Susaniña de Abella, Arca – O Pino

Unha salve á lúa nova
que non nos morda can nin cobra,
que non nos caia dente nin moa.

Muíños

O teu pai
foi ó viño.
Partiu a xerra
no camiño.
Mal da xerra,
mal do viño,
mal das patas do gatiño.

Miguel de Barbadás

Xan Pericán,
a cabalo dun can,
o can era coxo,
tirouno nun toxo.
Xan Pericán berraba
e o can escapaba.

Rocío de Brues (Boborás)

Benito, maldito,
matáchesme un pito
na fonte dos velos
con sete coitelos.
Benito a matar
o pito a gritar:
¡Cala, Benito,
que mas has de pagar!

Explicación:
A función deste dito é simplemente entreter e divertir.

Melorra do Covelo - Pontevedra

Benito matou o pito.
O pito a berrar,
Benito a matar.
Deixa, Benito,
que as has de pagar.

Celsa da fonte – San Xurxo de Sacos - Cotobade

Carapuchiño estaba na cama.
Entráballe o sol por unha “ventana”
e dáballe o sol e dáballe o vento
e carapuchiño estaba contento.

Fernando de Santiago, recollido en Ourense

Peido Bocho estaba na cama.
Dáballe o sol por unha “ventana”
e pola outra dáballe o vento.
Peido Bocho estaba contento.

Explicación:
Díselle ó/á neno/a cando aínda está na cama acabado de espertar.

Sabela - Ferrolterra