Para atinar

Escóitao

Rabo de boi,
rabo de besta,
dixo meu pai
que estaba nesta.

Explicación:
Unha persoa garda, ás escondidas, un obxecto pequeno (pedra, caramelo...) nunha das súas mans e ofrece a outra persoa as dúas mans pechadas e separadas boca abaixo para que adiviñe onde está o obxecto. Estoutra persoa vai sinalando alternativamente as dúas mans seguindo o ritmo do recitado. Ó rematar este, a persoa que escondía o obxecto debe abrir a man sinalada nese momento. Se nela está o obxecto o/a que atinou queda con el.

Rabo de cocha,
rabo de besta,
dixo meu pai
que estaba nesta.
Nesta estará,
dixo o cura
que era “verdá”.

Escóitao

Nesta ou nesta
no cabo da cesta,
dixo meu pai
que estaba nesta.

Cesta, cesta,
rabo de boi,
rabo de besta,
dixo meu pai
que estaba nesta.

Leite de cabra,
leite de besta;
dixo miña nai
que estaba nesta.

Lagarto, lagarto,
dime a verdade
que se non te parto.